సీతాఫలం కషాయంతో బోల్‌వార్మ్‌తో పాటు పలు రకాల పురుగులను అరికట్టవచ్చు. సీతాఫలం దొరికే కాలంలో చక్కగా ముదిరిన కాయలను మధ్యకు పగలచీల్చి నీడకు ఎండించి పొడిచేసి పెట్టు కోవాలి. అవసరమైనప్పుడు లీటరు నీటికి వంద గ్రాముల చొప్పున పొడి వేసి మరిగించి కషాయం తీసుకోవాలి. మరిగించినప్పుడు సగం వరకు మిగిలిన కషాయం వడకట్టి పెట్టుకొని 5 శాతం చొప్పున పిచికారి చేసుకుంటే కాయతొలుచు పురుగుతో పాటు అన్ని రకాల పురుగుల మీద చక్కగా పనిచేస్తుంది.

అడ్డసరం ఆకులు, కానుగాకుల కషాయం
ఈ రెండు రకాల ఆకులను సేకరించి శుభ్రపరచుకోవాలి. ఆకుల బరువుకు 16 రెట్ల నీరు తీసుకోవాలి. ఆకులను సన్నగా తరిగి ఒక కుండలో పోసి మరగకాయాలి. పాత్రలో ద్రావణం సగం అయ్యేవరకు సన్నని సెగమీద మరిగించి దించి వడకట్టి ఉంచుకోవాలి. ఈ ద్రావణం లీటరు నీటికి 10 మిల్లీ లీటర్ల చొప్పున కలిపి పిచికారి చేసుకోవాలి.

తుమ్మికూర కషాయం
వినాయక చవితి పండుగ వచ్చిందంటే చాలు ఉండ్రాళ్లతోపాటు తుమ్మికూర తినడం ఆచారం. తుమ్మికూర, తిమ్మికూరగా పిలిచే దీని శాస్త్రీయ నామం లూకాసఅస్పెరా. ఇది భారతీయ ఆయుర్వేద విధానంలో ప్రాధాన్యత కలిగిన మొక్క. ఈ తుమ్మికూరను సేకరించి ఆవు మూత్రంతో కషాయం చేసి పిచికారి చేస్తే అన్ని రకాల లద్దెపురుగులు, పాకుడు పురుగులు నశిస్తాయి.

విషముష్టి కషాయం
అటవీ ప్రాంతానికి దగ్గరి ప్రాంతాల్లో విషముష్టి మొక్క విస్త్రృతంగా లభిస్తుంది. విషముష్టి పళ్లు, ఆకులు, బెరడుల నుంచి తీసిన కషాయం పత్తి కాయతొలుచు పురుగును దరిదాపులకు రాకుండా తరిమేస్తుంది. అటవీ పరిసర గ్రామాలకు చెందిన వరంగల్, ఖమ్మం, అదిలాబాద్ జిల్లాల్లో రైతులు దీన్ని విస్తృతంగా వినియోగించుకుంటున్నారు.