తెలంగాణాలో వ్యవసాయ శాఖ ఆధ్వర్యంలో కొనసాగుతున్న విత్తనోత్పత్తి క్షేత్రాలను రక్షించాలని రైతు కమిషన్ ప్రభుత్వానికి సూచించింది. రాష్ట్ర వ్యాప్తంగా ఐదు జిల్లాల్లో 8 చోట్ల 1629 ఎకరాల్లో వున్న సీడ్ ఫార్మ్స్ ద్వారా గతంలో వివిధ రకాల విత్తనోత్పత్తి జరిగేది. కానీ గత కొన్నేళ్లుగా ఆ భూములు అన్యాక్రాంతం అవుతున్నట్లు కమిషన్ తన నివేదికలో వివరించింది. ఇవాళ సచివాలయంలో ప్రభుత్వ ప్రధాన కార్యదర్శి రామకృష్ణారావును కలిసిన రైతు కమిషన్ చైర్మన్ కోదండరెడ్డి, సభ్యులు భూమి సునీల్, గోపాల్ రెడ్డి.. సీడ్ ఫార్మ్స్ భూములపై రిపోర్ట్‌ను అందజేశారు. గత నెలలో కమిషన్ కామారెడ్డి జిల్లాలో పర్యటించిన సమయంలో మాల్తుమ్మెదలో 700 ఎకరాలకుపైగా వున్న సీడ్ ఫార్మ్ అన్యాక్రాంతం అయ్యే స్థితిలో ఉన్నట్లు అక్కడి స్థానిక రైతులు కమిషన్ దృష్టికి తెచ్చారని, వెంటనే కమిషన్ ఆ స్థలాన్ని పరిశీలించినట్లు సీఎస్‌కు వివరించారు. సీడ్ ఫార్మ్స్‌పై ఈనెల 2న కమిషన్ కార్యాలయంలో వ్యవసాయశాఖ అధికారులతో కమిషన్ సమీక్ష సమావేశాన్ని నిర్వహించింది. ఆ సమావేశంలో మిగతా చోట్ల కూడా విత్తనోత్పత్తి క్షేత్రాల భూములు ఆగమౌతున్నట్లు కమిషన్ గుర్తించింది. అంతేకాదు భూ భారతిలో కొన్ని చోట్ల భూములు ఎక్కకపోవడంపై సీరియస్ అయ్యింది. ఈ విషయాలని సైతం ఇవాళ సీఎస్ రామకృష్ణారావుకు కమిషన్ చైర్మన్ కోదండరెడ్డి, సభ్యులు గోపాల్ రెడ్డి, సునీల్ వివరించారు. వెంటనే ఆ భూములను కాపాడాలని, ఆ భూముల చుట్టూ ఫెన్సింగ్ ఏర్పాటు చేయాలని కోరింది.