నైరుతి 2023 ఆలస్యంగా ప్రారంభమై రైతులలో ఆందోళనకు, అలజడికి కారణం అయింది. రైతులపై ప్రభావం చూపుతోంది. రైతులు వ్యవసాయ పనులు ప్రారంభించటానికి సకాలంలో రుతుపవనాల ప్రారంభ అంచనాలు అవసరం. చాలా కీలకం కూడా. ఎందుకంటే నైరుతి రుతుపవనాల రాక అనేది వ్యవసాయం మీద ఆధారపడి జీవనోపాధి పొందే కోట్లాది ప్రజానీకం ఎంతో ఎదురుచూసే విషయం. ఇది వారి జీవితాలతోపాటు దేశ ఆర్థిక ప్రగతిని ప్రభావితం చేస్తుంది కనుక. రుతుపవన కాలం జూన్‌ నుండి సెప్టెంబర్‌ వరకు కొనసాగటమే కాకుండా ఇది దేశ వ్యవసాయ రంగానికి కీలకం. దేశ వార్షిక వర్షపాతంలో నైరుతి వాటా 70% పైగా ఉంటుంది. వర్షాకాలం సకాలంలో వచ్చి కొనసాగితే రైతు జీవితం సాఫీగా సాగిపోతుంది. లేదంటే సాగు సజావుగా సాగటం కోసం వర్షాల కోసం ఎదురు చూపులు అయితే మాత్రం రైతులకు ఆశ బదులు నైరాశ్యం ఆవహిస్తుంది. భయాందోళనలు పెరుగుతాయి. తెలియని అయోమయం ఏర్పడుతుంది. వర్షాభావంతో పాటు, ఒక్కోసారి ఒక్కో వర్షానికి మధ్య పెరిగే కాలం, అతివృష్టి తదితర కారణాల వల్ల పంటకి నష్టము జరిగి, రైతు ఆర్థికంగా నష్టపోవలసి వస్తుంది.
దేశంలో, ప్రపంచంలో ఎందరో శాస్త్రవేత్తలు, సంస్థలు వాతావరణ మార్పులు చేర్పుల గురించి సకాలంలో అందించేందుకు పరిశోధనల ద్వారా కృషి చేస్తూ రైతులకు సాయం చేస్తున్నారు.
రుతుపవనాల ప్రారంభానికి సంబంధించిన ఖచ్చితమైన దీర్ఘకాలిక సూచనలను అందించడం ద్వారా రైతులకు చేదోడు వాదోడుగా భారత వాతావరణ శాఖతోపాటు పలు వ్యవసాయ విశ్వవిద్యాలయాలు కూడా నిరంతరం పనిచేస్తూనే ఉన్నాయి. ఈ సంవత్సరం ఎల్‌నినో ప్రభావం ఎక్కువగా ఉండే అవకాశం ఉందని అన్నారు. అలానే రుతుపవనాల గమనం ఉంది. విస్తరణ కూడా అలానే ఉండటంవల్ల వారి అంచనాలు బలపడ్డాయి. అడపాదడపా వర్షము కురిసినపుడు కుంభవృష్టి, ఒక వర్షంకు మరో వర్షానికి ఎక్కువ కాలం ఉండటం, నిరంతరము వర్షాల తీరు తెన్నుల గురించి వివరణాత్మక సమాచారాన్ని అందిస్తున్నాయి. రుతుపవనాల ఖచ్చితమైన సమయం, ప్రదేశాన్ని తెలుసుకోవడం ద్వారా, అలాగే ప్రారంభ వర్షపాతం తరువాత పొడి వాతావరణం ఏర్పడితే వచ్చే ప్రభావం తెలుసుకోవడం ద్వారా, రైతులు సకాలంలో పొలం పనుల గురించి మంచి సమాచారంతో సకాలంలో సరైన నిర్ణయాలు తీసుకోవచ్చు.
ఈ సంవత్సరం మార్చి, ఏప్రిల్‌లో, దక్షిణ హిందూ మహాసముద్రంలో సాధారణం కంటే ఎక్కువ గాలి ఉష్ణోగ్రతలు ఏర్పడ్డాయి. తర్వాత భూమధ్యరేఖ తూర్పు పసిఫిక్‌ మహాసముద్రం క్రమంగా వేడెక్కటం, ఈ వేడెక్కడం ఎల్‌నినో పరిస్థితులలో మార్పుకు సంకేతం కావటం చూశాం. దీనితో జూన్‌లో నైరుతి రుతుపవనాలు వచ్చినపుడు భూమధ్యరేఖ పసిఫిక్‌ మహాసముద్రంలో ఒక ప్రత్యేకమైన స్థితిలో ఉంటుంది, దీనివల్ల రుతుపవనాలు స్థిరపడక ముందే ప్రత్యామ్నాయ అడపాదడపా వర్షాలు, పొడి గాలులు ఏర్పడతాయి. ఇది కూడా చూశాం. ఇటువంటి మార్పులు గత కొద్ది కాలంగా జరగటం, దీనికి కారణం వాతావరణ మార్పులు అని నిపుణులు నిగ్గు తేల్చారు. వీటిని తట్టుకునేందుకు పరిష్కార మార్గాలు ఉన్నాయి. వాటిని అందరూ ప్రపంచ వ్యాప్తంగా ఆచరించాలి. ఇది ఒక్కరి సమస్య కాదు. అంతర్జాతీయ సమస్య కూడా. అయితే ప్రస్తుతానికి రెండు తెలుగు రాష్ట్రాలలో నైరుతి బాగా ఆలస్యం అయ్యింది. దానికి తోడు విస్తరణ కూడా ఆశాజనకంగా లేదు. అందువల్ల ప్రస్తుతానికి సాగు పనులు ఆశాజనకంగా లేవు. జూలై నెలలో రాబోయే వర్షాలు పడి విస్తరిస్తేనే పంటకాలం సజావుగా సాగుతుంది. ఇటీవల కాలంలో ప్రతి పంట కాలంలో ఈ సమస్య చూస్తున్నాం. రోజురోజుకు అధికమౌతున్న వాతావరణ మార్పులతో ఎదురౌతున్న సమస్యలు దృష్టిలో పెట్టుకొని ప్రభుత్వాలు రైతులను ఆదుకోవాలి. వారిని సాగుకు సమాయత్తం చేయాలి. మరీ ముఖ్యంగా రుతుపవనాలు ఆలస్యం అయితే వారికి ప్రత్యామ్నాయ ప్రణాళిక సిద్ధం చేసి అందించాలి. ఎన్నికలు సమీపిస్తున్న తరుణంలో రాజకీయ పార్టీలకు ముఖ్యంగా పాలక పక్షాలకు నైరుతి నైరాశ్యం, దిగులు, గుబులు పుట్టిస్తోంది. అందువల్ల రైతులకు అందాల్సిన సహకారం తప్పనిసరిగా అందే అవకాశం ఉంది, ఉంటుంది కూడా. ఏ మాత్రం తేడా వచ్చినా ఫలితాలు మరో రకంగా ఉంటాయి కదా! అందువల్ల నైరుతి నైరాశ్యం నుంచి రైతు గట్టెక్కగలరనే నమ్మకముంది.
– వేంకటేశ్వరరావు
