17 Oct, 2026
రైతునేస్తం0 commentsOctober 17, 2026agri news

భూసార పరిరక్షణ

నేలను విడిచి సాము చేయలేమన్నది అనుభవాల నానుడి
నేలను తొలచి ఏ ఖనిజాల భోంచేయలేమన్నది నిక్కమైన రూఢి
నేల సారం మరచి సాగు చేయగలమని రైతులోకం పొరబడి
ఎరువంటే మరయంత్రపు గుళికలొకటే అని దాని వెంటబడి

ఏటా పొందుతున్నారు నిస్సారపు ధాన్యరాశుల దిగుబడి
ఎంత కాలమిలా అవగాహనాలేమి అనారోగ్య హానికర సాగుబడి
ఏ మాత్రమూ తగదు మన్నుకు నీ మేనుకు ఈ అపకార ఒరవడి
పర్యవసానాల పరిష్కారాలకై పరుగులెత్తు త్వరపడి

తరిగిపోతున్నది..
త్వరత్వరగా వడివడిగా తరిగిపోతున్నది
తరతరాలు మన్నవలసిన ఈ నేలయందలి మన్ను సారం
మునుపటి కంటే వడిగా తరిగి… పోతున్నది

తరలిపోతున్నది..
మరల మరల దుక్కులతో వరదల కరిగిపోతున్నది
తరగని గని వంటి సారం మన్ను.. బిరబిరా తరలి సాగర తీరం
చిరుజల్లుకు సైతం కదిలి కడలివైపు…. పోతున్నది

తగలబడుతున్నది..
ఎరగడి మంటల మలమల మాడిపోతున్నది
సర్వ జీవుల పార్థీవదేహాల తన ఎదల దాచుకునే భూమాతరం
కార్చిచ్చు తోడ తగలబడి….. బూడిదవుతున్నది

మరల రాకున్నది..
సార హీన నేలయందు పోషక రాశి మరల రానన్నది
కర్మాగార గరళమే మరణ శాసనమై క్షీణించుకపోయిన భూసారం
కరముల జోడించి ఎంత వేడినా…. మరల రాకున్నది

తరచి చూడమన్నది..
పైరు పెంపుకు ఇరుసు వంటి సేంద్రియ కర్బనం కరువవుతున్నది
మరుసటి తరం మనుగడకై పదిలమైన మన్నొకటే మూలాధారం
కన్నులు తెరచి తరచి చూడ… వేడుతున్నది

ఓసారి… ఒక్కసారి… తప్పనిసరి… తప్పదు మరి…

నేటి అవసరం.. ఆపాత జ్ఞాన రీతుల నెమరేసుకునుడు
నెమరేసుకునుడే కాదు.. ఒక్కొక్కటి ఒదలకుండా పాటించుడు
కోతల కాగానే పిలువకు… ఎగిసిపడే మంటల దేవుడు
పంట అవశేషాల కాల్చకు… అచ్చాదనలకై వదలి చూడు

పదింతల మేలు పశువుల మేతకు వదులుడు
మరి కొన్నాళ్ళు సన్న జీవాల మంద కట్టుడు
మరచిపోకు ఎల్లవేళలా నేలన ఆకులు కప్పి ఉంచుడు
నేలకు గాయం కాకుండా జీర్ణం అయ్యేలా కలియదున్నుడు

పలు రకముల పచ్చి రొట్టలు పద్దతిగా పెంచినపుడు
పప్పు ధాన్యాలను, తీరైన అంతర పంటలను ఎంచినపుడు
పంట మార్పిడితో సమయానికి తగు నేర్పు చూపించినపుడు
ఆ తదుపరి.. ఓ హలధారి.. జర్ర వెనక్కి మర్రి చూడు

తిరిగి వస్తున్నవి
సుస్తీ అయిన నేలమ్మకు చికిత్స చేసేందుకు
సుశిక్షితులైన మిత్ర కీటక మహోన్నత కూటమి.. తిరిగి వస్తున్నవి.

ఎరగడి మంటల హడలిపోయి
నేల పొరల దీర్ఘ నిద్రావస్థ యందు బడలిన ఎర్రల దండు
ఉర్వికి ఉపకారులై ఉపరితలమునకు.. తిరిగి వస్తున్నవి

కుప్పను తగలబెట్టి పేలాలు వేయించుట అలవి కాని అవివేకము
బంగారి గుడ్లకై బాతు కుత్తుక పట్టి పొట్టను చీల్చుట అంతులేని అజ్ఞానము
అన్నమన్న ఆనాటి జనులకు ఆహార భద్రత ఇచ్చె సాంద్ర సేద్య రీతి
దుక్కి దున్ను కిసానులకు ఆరోగ్య- ఆదాయ భద్రత మాత్రం అధోగతి

నేలవిడిచి సాము చేయుట, నేల సారం మరచి సాగుబాట అసాధ్యము
బలమైన బువ్వ, ఆ బువ్వను పండించెడి బలమున్న భూమి అత్యావశ్యము
భూసారమున్న నేలలోనే సత్తువున్న పంటలు, ఆనక పోషక సహిత వంటలు
భూసుపోషణ, సస్యావరణ పరిరక్షణతోనే పదికాలాలు పదిలం భావితరములు

  • యాదగిరి శ్రీనివాస్, 9393666693

Read More
20 Jan, 2026
రైతునేస్తం0 commentsJanuary 20, 2026agri news

పురుగు మందుల నాణ్యతా ప్రమాణాలకు ప్రాధాన్యం

మనదేశంలో పురుగు మందులు వినియోగిస్తే కొన్నిసార్లు పురుగులు కాకుండా పంటలు నాశనమవడం, తెగుళ్లపై ఎలాంటి ప్రభావం కనిపించకపోవడం, రైతులు మరణించడం, పర్యావరణానికి తీవ్ర హాని జరగడం సర్వసాధారణంగా మారింది. మరోవైపు ఈ విపరిణామాల బాధ్యులు చట్టం నుంచి సులువుగా తప్పించుకుం టున్నారు. ఈ ధోరణిని నియంత్రించడానికి కేంద్ర ప్రభుత్వం నాణ్యతకు, ప్రాణాలకు అత్యంత ప్రాధాన్యమిస్తూ… వాటిని ఉల్లంఘించిన వారికి రూ. అర కోటి జరిమానాతో పాటు ఐదేళ్ల జైలు శిక్ష విధించేలా వ్యవసాయ, రైతు సంక్షేమ మంత్రిత్వ శాఖ నూతన పురుగు మందుల నిర్వహణ (పెస్టిసైడ్స్ మేనేజ్‌మెంట్) చట్టం తెస్తోంది. ముసాయిదా బిల్లుపై అభిప్రాయాలు తెలపాలంటూ తెలంగాణ సహా అన్ని రాష్ట్రాలకు లేఖలు పంపింది. రైతులు, పౌరసమాజం సైతం సూచనలు చేయడానికి ఫిబ్రవరి 4వ తేదీ వరకు గడువునిచ్చింది. ముసాయిదా బిల్లును మంత్రిత్వ శాఖ వెబ్‌సైట్ agriwelfare.gov.inలోనూ ఉంచింది.
కేంద్రానికి సర్వాధికారాలు
ప్రస్తుతం అమలులో ఉన్న పురుగు మందుల చట్టం(1968), పురుగు మందుల నిబంధన(1971)ల్లో ఉన్న లోపాలను సవరించడానికే కొత్త చట్టం తెస్తున్నట్లు కేంద్రం పేర్కొంది. ‘పురుగు మందుల తయారీ, అమ్మకం నుంచి వాడకం వరకు పారదర్శకతను తీసుకురావడం, రైతులకు నాణ్యమైనవే అందేలా చూడటం, వాటి ప్రమాణాలు గుర్తింపు సామర్థ్యం పెంచడం, నకిలీలను నియంత్రించడం, కఠిన జరిమానాలు విధించడం, తయారయ్యే ప్రతి మందునూ ప్రయోగశాలల్లో పరీక్షల అనంతరమే ధ్రువీకరించడం, జీవ పురుగు మందుల వినియోగాన్ని ప్రోత్సహించడం, మానవులు, జంతువులు, పర్యావరణానికి కలిగే ముప్పును తగ్గించడం, స్వదేశీ తయారీ భారీఎత్తున పెంచడం” తమ లక్ష్యాలని వెల్లడించింది. ఈ చట్టం అమలులోకి వచ్చాక దేశవ్యాప్తంగా పురుగు మందుల నాణ్యత, పంపిణీ అధికారాలు కేంద్ర ప్రభుత్వానికి సంక్రమిస్తాయి.
తయారీదారులు ప్రమాణాలు పాటించాలి
పురుగు మందు పేరు, బ్యాచ్ నంబరు, గడువు తేదీలను డబ్బాపై ముద్రించాలి. తయారీ సంస్థ పేరు, చిరునామా, ఉత్పత్తి స్థలం, వాడిన రసాయనాలు, ఇతర వివరాలుండాలి. ప్యాకేజింగ్ ప్రమాణాలను పాటించాలి. లైసెన్స్ ఉన్న ప్రాంగణాల్లో, భద్రత ప్రమాణాలకు అనుగుణంగా మాత్రమే ఉత్పత్తి జరగాలి. క్యూఆర్ కోడ్ ద్వారా వివరాలు వెల్లడించే సాంకేతికతను వినియోగించాలి.
ఉల్లంఘిస్తే శిక్ష
పురుగు మందుల రసాయన మిశ్రమంలో మార్పులు ఉండి, ప్రభావాన్ని చూపలేకపోయినా, రైతుల ఆరోగ్యానికి హాని కలిగించినా, నాణ్యత తగ్గించేలా ఇతర పదార్థాలు కలిపినా తీవ్ర నేరంగా పరిగణిస్తారు. చట్ట నిబంధనలను ఉల్లంఘించి పురుగుమందుల తయారీ, దిగుమతి చేసుకున్నా… వాటి విక్రయంతో ఎవరైనా మృతి చెందినా, తీవ్రంగా గాయపడినా… ఉత్పత్తిదారుడు, సంస్థను బాధ్యులుగా పరిగణిస్తారు. వారికి ఐదేళ్ల వరకు జైలుశిక్ష, లేదంటే రూ.10 లక్షల నుంచి రూ.50 లక్షల వరకు జరిమానా విధిస్తారు. నేర తీవ్రతను బట్టి ఒకేసారి రెండూ విధించొచ్చు. రెండోసారి నేరం చేస్తే… మొదటిసారి విధించిన జరిమానా కంటే రెట్టింపు జరిమానా వేస్తారు. మూడోసారి నేరం చేస్తే… సంబంధిత సంస్థ రిజిస్ట్రేషన్, లైసెన్స్ శాశ్వత రద్దుకు పెస్టిసైడ్ ఇన్‌స్పెక్టర్ సిఫార్సు చేస్తారు. జరిమానాను చెల్లించకుంటే రిజిస్ట్రేషన్ కమిటీ ఇచ్చే రికవరీ సర్టిఫికెట్ ఆధారంగా జిల్లా కలెక్టర్ ఆ మొత్తాన్ని భూమి శిస్తు బకాయిల్లా వసూలు చేస్తారు. అవసరమైతే ఆస్తిని జప్తు చేస్తారు.

Read More