అన్నిరకాల వాతావరణ పరిస్థితుల్లోనూ సాగుకు అనుకూలంగా ఉండి, మంచి దిగుబడినిచ్చే కొత్తరకం చెరకు వంగడం ‘కర్ణ-18 (సీవో-18022)’ను హరియాణాలోని కర్నాల్‌లో ఉన్న సుగర్‌కేన్‌ బ్రీడింగ్‌ ఇన్‌స్టిట్యూట్‌ ప్రాంతీయ కేంద్రం అభివృద్ధి చేసింది. అత్యధికంగా చెరకు ఉత్పత్తి చేసే వాయవ్య భారతంలోని రైతులకు కర్ణ-18 రకం చెరకు వంగడం మంచి బహుమతి లాంటిదని ఈ కేంద్ర సీనియర్‌ శాస్త్రవేత్త ఎం. ఆర్‌. మీనా తెలిపారు. ఇది లవణీయత, కరవు పరిస్థితులను కూడా తట్టుకొంటుందని.. చెరకును పట్టి పీడించే ఎర్ర, టాప్‌ బోరర్‌ వంటి తెగుళ్ల బెడద కూడా ఉండదన్నారు. ఇది రాటూన్‌ క్రాప్‌నకు (ప్రధాన పంటను కోసిన తర్వాత మిగిలిపోయిన వేర్లు/మొద్దుల నుంచి వచ్చే ద్వితీయపంట) కూడా అనుకూలమన్నారు. ఈ రకం చెరకు దిగుబడి హెక్టారుకు 98.6 టన్నులుగా.. చక్కెర మిల్లుల వద్ద రికవరీ దాదాపు 11 శాతంతో హెక్టారుకు 12.6 టన్నుల పంచదార ఉత్పత్తి ఉంటుందని మీనా తెలిపారు.