వేగంగా అభివృద్ధి చెందుతున్న రంగంపై నమ్మకాన్ని పెంపొందించడానికిగాను మొక్కల ఆధారిత ఆహార తయారీదార్లు తమ ఉత్పత్తి లేబుళ్లపై క్యూఆర్ కోడ్లు వినియోగించాలని ఆహార భద్రతా ప్రాధికార సంస్థ FSSAI బుధవారం కోరింది. ప్రస్తుతం వాడుతున్న లేబుళ్లపై వివరాలను వినియోగదార్లు చదవడానికి ఇబ్బందిగా ఉన్నాయని పేర్కొంది. మొక్కల ఆధారిత ఆహార పదార్థాల సమ్మిట్‌లో FSSAI చీఫ్ ఎగ్జిక్యూటివ్ అధికారి రజిత్ పున్హాని మాట్లాడుతూ, క్యూఆర్ కోడ్లను తప్పనిసరి చేయాలని తాము చూడటం లేదన్నారు. కానీ కంపెనీలు స్వచ్ఛందంగా ఈ సాంకేతికతను స్వీకరించాలని కోరుకుంటున్నామన్నారు. తద్వారా యువ వినియోగదార్లు పదార్థాల జాబితాలను, పోషకాలను క్యూఆర్ కోడ్‌ను స్కాన్ చేసి ధ్రువీకరించుకో గలుగుతారని తెలిపారు. ప్రస్తుత లేబుళ్లు చాలా చిన్నవిగా, చదవడానికి అర్థం చేసుకోవడానికి కష్టంగా ఉన్నాయని పున్హాని వెల్లడించారు. ముఖ్యంగా జెన్‌జీ వినియోగదార్లు రోజువారీ పోషక అవసరాలను తనిఖీ చేయడానికి కోడ్లను స్కాన్ చేసుకుంటారని వివరించారు.